نیوٹریشن بذریعہ نیٹ ورک مارکٹ

 نیوٹریشن  بذریعہ نیٹ ورک مارکٹ

آج کے دور میں صحت مند زندگی اور ایک اچھا روزگار ہر فرد کی ضرورت ہے۔ موجودہ حالات میں ایک طرح سے روزگاروں میں چھٹنی اور نئے روزگار پیدا نہیں ہونا ایک دشوار کن مرحلہ بن گیا ہے۔ ایسی صورت و حالت میں نئے روزگار کے بارے میں غور کرنا اور سوچنا بھی ضروری ہے۔

لیکن گھبرائیے نہیں سیکھنے اور کرنے والے کے لئے نیٹ ورک مارکٹ میں بہت کچھ ہے۔ اگر آپ نے کبھی ’’دروازے دروازے ‘‘ جا کر لوگوں کو سامان بیچا ہے یا بیچنا پسند کرتے ہیں اور کچھ نیا کرنا چاہتے ہیں تو آپ کے لئے موقع ہے اچھے پیسے کمانے کے اور اچھی زندگی جینے کے۔ آپ انگریزی میں اِس کا نام لیں گے تو لوگوں پر زیادہ اثر ہوگا۔ (کیوں کہ ہم برسوں سے انگریزی کے غلام بن چکے ہیں۔)  ’’ڈور ٹو ڈور مارکیٹنگ‘‘ یا  ’’اِن ہیرٹ بزنس‘‘ گڈ ہیلتھ اینڈ لائف اسٹائل۔ 

⚽ نیوٹریشن یعنی غذائیت کیا ہے اور غذائیت کیوں ضروری ہے؟  ⚽

سب سے بنیادی سطح پر، غذائیت ایک باقاعدہ، متوازن غذا کھانے کے بارے میں کہا جاتا ہے۔ 

اچھی غذائیت آپ کے جسم کو ایندھن میں مدد دیتی ہے۔ 

آپ جو غذا کھاتے ہیں وہ آپ کے جسم کو آپ کے دماغ، پٹھوں، ہڈیوں، اعصاب، جلد، خون کی گردش اور مدافعتی نظام کو برقرار رکھنے کے لیے درکار غذائی اجزاء فراہم کرتے ہیں۔

جسم کو برقرار یا صحت مند رکھنے کے لئےغذائیت بہت ضروری ہے۔

اس کو حاصل کرنے کا پہلا ذریعہ قدرتی غذا ہے۔ اس کا بہتر طریقہ سنت نبوی سے ملتا ہے۔ امام ابن قیم رحمۃ اللہ علیہ کی کتاب ’’طب نبوی‘‘ کے نام سے کتاب بازار میں موجود ہے۔  اور بھی کئی مصنّفین کی کتابیں معاون ہیں۔

نیچرل طریقے سے جسم کو صحت مند رکھنے یا بیمار ہونے پر علاج کے قدرتی طریقے کو نیچروپیتھی کہتے ہیں۔ 

علاج کے جتنے بھی طریقۂ کار ہیں تقریباً سبھی میں قدرتی غذاؤں کو شامل رکھا گیا ہے۔ لیکن لوگوں کے رہن سہن، حالات اور موسم کی تبدیلی نے صحت مند رہنے کے لئے کئی طرح کے مزید طریقے ایجاد کر لئے گئے ہیں۔ ابھی تک جو ہم نے مطالعہ کیا ہے، تجربہ کیا ہے، یا بھگتا ہے تو ایسی صورت میں صحت مند رہنے کے لئے ضروری ہے کہ قدرتی طریقہ کار کو اپنایا جائے۔

نیچروپیتھی اب آیوش منترالیہ میں منظور شدہ ہے۔

بیمار ہونے کے بعد علاج کے مختلف طریقے سماج میں رائج ہیں۔ جیسے ایلوپیتھی، ہومیوپیتھی، یونانی یا آیوروید۔ اس کے علاوہ بھی کئی طریقے رائج ہیں جو گھریلو کہے جاتے ہیں۔ جس کونہ تو عام لوگ اہمیت دیتے ہیں اور نہ ہی گورنمنٹ کے نزدیک کوئی اہمیت ہے۔ جیسے نسوں اور ہڈیوں کے ماہرین گاؤں دیہاتوں میں پائے جاتے ہیں۔ سانپ یا زہریلے کیڑے مکوڑے کے کاٹے کا علاج کسی بھی پیتھی میں مکمل طور پر نہیں ہے۔ یہ بھی گاؤں کے ماہرین بہت حد تک نپٹا دیتے ہیں۔ اسپتال میں تو صرف تسلی رہتی ہے۔ بس۔ 

⚽ نیوٹریشن کیا ہے؟⚽

اب رہی بات آج کے بھاگم بھاگ زندگی کی تو ایسے میں نیوٹریشنل ویلیو کی بہت اہمیت ہے۔ جس کے حاصل کرنے کا قدرتی طریقہ پھل ، سبزیاں یا آگ بغیر پکے ہوئے کھانے سے ملتا ہے۔ جس کے پاس کھانا کھانے کے لئے وقت نہیں ہے، وہ نیوٹریشنل کیپسول، ٹیبلٹ یا رَس پر گزارہ کرنا پڑتا ہے۔

اکثر آپ نے ٹی وی وغیرہ پر ریوائٹل کا اشتہار دیکھا یا سنا ہوگا۔ بہت سارے لیتے بھی ہیں۔ دماغین، چیون پراش اور مختلف قسم کے ٹانک بھی لوگ استعمال کرتے ہیں۔ جس کو جیسی سہولت یا پسند ہے وہ کرتا ہے۔

پوری دنیا میں ہزاروں کمپنیاں ایسی ہیں جو نیوٹریشنل ٹیبلٹ، کیپسول یا رَس یعنی سیرپ بناتی ہیں اور بیچتی ہیں۔ ہاں بیچنے کا طریقہ الگ ہے۔ 

⚽نیٹ ورک مارکٹ کیا ہے؟ ⚽

اکثر و بیشتر نیوٹریشنل پروڈکٹ ’’نیٹ ورک مارکٹ‘‘ کے ذریعہ عام لوگوں کو فروخت کئے جاتے ہیں۔ یہ بہت ہی پرانا طریقۂ کار ہے اپنے پروڈکٹ کو صحیح و سالم لوگوں تک پہنچانے کا۔ بہت کم ایسی کمپنی ہے جس میں تھرڈ پارٹی شامل نہیں ہے۔ ورنہ اکثر تھرڈ پارٹی کے شامل ہونے کی وجہ سے پروڈکٹ کی کوالیٹی میں کمی یا خرابی آ جاتی ہے، جس کی وجہ سے مارکٹنگ میں پروبلم آ جاتی ہے اور اِسی وجہ سے نیٹ مارکٹ میں کام کرنے والے بد ظن ہو جاتے ہیں۔  اکثر لوگ اسے پھنسے پھنسانے والا بزنس کہتے ہیں، اور کرنے والے کا مذاق بناتے ہیں۔ تھرڈ پارٹی کی شمولیت کی وجہ سے اکثر نقصان بھی اٹھانا پڑتا ہے۔ لیکن جو لوگ تجارت کے طور طریقے کو سمجھ لیتے ہیں، وہ شاذ و نادر ہی نقصان کے شکار ہوتے ہیں۔ اکثر لوگ بہت پیسے کماتے ہیں۔ یہاں تک ایک میڈیکل پریکٹشنر سے بھی کئی گنا زیادہ۔

اب رہی بات کہ وہ کس قدر کارگر ہے؟ اس کا جواب یہ ہے کہ وہ بہت ہی مناسب اورکارآمد پروڈکٹ ہوتے ہیں۔ جو مصروف لوگوں کے صحت کی ضمانت کے طور پر کارگر ہیں۔ بہت سے وہ لوگ جسے اسپتالوں نے علاج کرنے سے انکار کر دیا، یعنی یہ کہہ دیا کہ ’’لے جائیے، گھر پہ خدمت کیجیے‘‘ یا ایسا بھی ہوا کہ برسوں سے علاج کے بعد بھی افاقہ نہ ہونے پر جب اُن کو نیوٹریشن دیا گیا تو وہ چند مہینے میں صحت مند ہو گئے۔ اور بعض تو ایسے ہو گئے جیسے کہ وہ کبھی بیمار ہی نہ تھے۔

ویسےتو میرے پاس تقریباً ڈھائی سو کمپنیوں کی فہرست اور پچاس سے زیادہ کمپنیوں کے کام کاج کے بارے میں معلومات موجود ہیں جن میں اِس وقت بھی ایک مشہور نام مارکیٹ میں گردش کر رہا تھا۔ لیکن چند برسوں میں ہی اس کا نتیجہ بھی خراب آنے لگا اور لوگ کمپنی کو چھوڑنے لگے۔ گزشتہ تین برس تک بہت عمدہ ریزلٹ تھا۔ ہزاروں لوگ مختلف بیماریوں سے چھٹکارا پا چکے ہیں۔

ہندوستان میں بہت سی ایسی کمپنیاں ہیںجس میں شامل ہو کر اکثر لوگ ناکام ہوئے ہیں، کیوں کہ جوڑنے والے اکثر خود کمپنی کی پالیسی اور طور طریقے کو نہیں جانتے اور پروڈکٹ کے بارے میں تو بہت کم ہی لوگ جانتے ہیں۔ ایسی حالت میں جو کسی دوست یا ساتھی کے کہنے کی بنیاد پر کمپنی سے جُڑ جاتے ہیں، اور ساتھی پر ہی بھروسہ کر کے بزنس کرنا پسند کرتے ہیں، وہ نقصان اٹھاتے ہیں۔ اور نیٹ ورک مارکٹ سے بدظن ہو جاتے ہیں۔ اور سب سے بڑا نقصان تعلقات کی خرابی کا ہوتا ہے۔ لہٰذا بہتر تو یہ ہوگا کہ کمپنی کے طور طریقے اور پروڈکٹ کے بارے میں خود اطمینان کرکے ہی کمپنی سے جڑیں اور لطف لیں۔جو ریلائبل  یعنی قابلِ اعتماد کمپنی ہوتی ہے،ایک مناسب رقم میں اُن کے بنائے ہوئے پرڈکٹ کو خریدنا ہوتا ہے، جو آپ کو کمپنی میں شامل کرنے والے کے اسپانسر کے بعد ہی ممکن ہے۔ اگر کمپنی اپنے بنائے ہوئے پروڈکٹ آپ سے بیچتی ہے تو تب تو کمپنی قابلِ اعتماد ہے، ورنہ نہیں۔

وہ کیسے؟ کئی کمپنی ایک معینہ قیمت لے کر سوٹ پیس دے دیتی ہے کہ اس چاہے آپ خود استعمال کیجیے یا بیچ دیجیے اور اپنے جیسے دو یا چار یا دس مزید کسٹمر لائیے تو ہم آپ کو یہ انعام دیں گے، یا اپنی کمپنی کا دوسرا پروڈکٹ اتنے فیصد رعایت پر دیں گے۔ جو عموماً اُن کے پروڈکٹ بھی نہیں ہوتے بلکہ دوسری کمپنیوں کے مال کو مہنگے داموں میں رعایت کر کے بیچتے ہیں۔ اور کہتے ہیں کہ آپ اسے خود استعمال کریں یا بیچ دیں۔ اس طرح کی کمپنیاں عموماً آپ کے پیسے سے اور آپ کی محنت سے اپنا پروڈکٹ بیچنا چاہتی ہیں، جب کہ اُسی طرح کے پروڈکٹ بازار میں آسانی سے اور کم قیمت پر دستیاب ہیں تو کمپنیوں سے اکثر لوگ ایک طرح سے ٹھگی کے شکار ہوتے ہیں۔ بلکہ آپس میں ایک دوسرے کو ٹھگتے ہیں۔ یہ آپس میں ہی ایک دوسرے کو بتاتے سکھاتے رہتے ہیں اور جوڑتے رہتے ہیں۔

جب کہ ایک ریلائبل  یعنی قابلِ اعتماد کمپنی اپنے پروڈکٹ کے ذریعہ آپ سے شروعات کرنے کو کہتی ہے۔ خود ٹریننگ کا مکمل بندوبست کرتی ہے۔ آپ کے سوالوں اور اشکالات کا تسلی بخش جواب دیتی ہے۔ اور کہتی ہے کہ اگر آپ کو اطمینان ہے تو آپ کمپنی کے طور طریقے کے مطابق کام کو سیکھیں اور لوگوں تک پروڈکٹ پہنچائیں اور پیسے کمائیں۔ 

اور روزانہ سیکھیں، تاکہ آپ زیادہ پروڈکٹ زیادہ لوگوں تک پہنچائیں اور زیادہ پیسے کمائیں۔ جب آپ سیکھ جائیں تو جن کو بھی اسپانسر کریں، اُن کی صحیح تربیت کریں۔ کمپنی کے ٹریننگ پروگرام میں شرکت کو لازم کریں۔اتفاقاً اگر آپ کسی بھی طرح پروڈکٹ بیچنے یعنی نئے کو اسپانسر کرنے میں کامیاب نہیں ہو پا رہے ہیں، تو کمپنی کے ذریعے دیئے جانے والے فری ٹریننگ سے بہت کچھ سیکھ جائیں گے۔ اتنا سیکھ جائیں گے کہ دوسری جگہوں سے ایسا سیکھنے کے لئے ہزاروں روپے ایک ایک سیمینار اٹینڈ کرنے کے دینے پڑیں گے۔ لہٰذا بہتر تو یہ ہوگا کہ آپ پروڈکٹ کے بارے میں جانیں، کئی کمپنیوں میں ایک طرح سے  بی فارما یا ڈی فارما لیول تک کی معلومات فراہم کرا دی جاتی ہے۔ بزنس میں بھی بی بی اے یا ایم بی اے تک کی تعلیم دے دی جاتی ہے۔ ایسی حالت میں بہت سارے لوگ دونوں میدانوں میں ماہر بن جاتے ہیں۔ یا پھربزنس میں ماہر ہو گئے تو اپنا اچھا خاصا بزنس تو کر ہی لیتے ہیں۔ یعنی بغیر پیسے لگائے کامیاب ہونے کی اچھی جگہ ہے۔

اور اگر آپ کو کمپنی کے طور طریقے اور پروڈکٹ پر اطمینان نہیں ہے تو آپ مزید پیسے نہ لگائیں، توجہ ہٹائیں اور دوسرے کام کی طرف راغب ہوں۔ اور جہاں لالچ زیادہ دیا جائے، خواب دکھائے جائیں تو سمجھ لیجیے آپ پھنسنے جا رہے ہیں۔

☘️🌿🍀🌱🌲🎄🌻

فیروزہاشمی، نوئیڈا، اترپردیش

۱۹؍نومبر۲۰۲۳ء

☘️🌿🍀🌱🌲🎄🌻